Embedded Files
2025暑B #走揣台灣味
D1~D3
這是一tīn，會問我講：
「為啥物日本人佇台灣做總督，毋免台灣人投票？有可能人無佮意這个ah？」
「是按怎蔣介石會用eh做遮久ê總統? 為啥物伊會用eh改法律？袂按怎做才會當罷免伊？」
民主自由對in來講就是空氣佮水，根本無法度理解、抑是想像，威權是啥物；
行到佗位攏會迷着逐家ê目睭，比讚、討論，然後轉換語言頻道開始講台語，閣紲來，敢若是想起啥，閣家己補充「着，台灣人就是愛講台語」，出現一種對迷濛到精神ê表情，微微仔笑咧—in就是有這種魔力；
足有家己ê想法，想欲啥無欲啥攏講佮清清楚楚，連冤家ê時mā是:
「你拄才是講xxoo⋯⋯」
「我拄才是講ooxx⋯⋯」
無咧驚mā無欲相讓，一定愛共代誌講清楚，勇敢閣自在；
毋過若是開始討論欲煮啥物，mā會用eh你一句我一句：
「按呢咱...」
「但是⋯」
「無就⋯」
「mā會當...」
......
最後揣着一个上好ê方式，
「我共記錄起來！」；
就是按呢ê一tīn，
活跳跳ê，
台灣寶貝囡仔。
2025.07.19
D4 煮食
這幾工，聽了佮食物有關係ê歷史故事以後，囡仔攏會得著點數（毋知敢有人發現點數ê秘密？）。用點數in會當換食材卡片。
幾工仔過去，囡仔提着愈來愈濟ê食材卡片。in想欲煮ê菜，mā愈來愈濟⋯
這梯ê囡仔年歲較細，毋過心肝足大。每一組開出ê菜單攏四項以上，上細漢ê彼組，講in欲煮八路菜......是欲辦桌喔。
阮無直接阻擋，心內恬恬咧想：
等到市場hònn，in應該就會發現，預算無夠啦！
想袂到！東門市場傷好買，竟然攏予in買著--啊。
阿無要緊，等入去廚房教室hònn，in就會知影時間無夠啦！
想袂到！廚房有天兵天將鬥跤手，竟然真正予in佇40分鐘速速出菜，全部完成！
囡仔phâng出來ê菜佮in ê故事，已經佇相片內底，逐家會用eh家己看。特別想欲分享ê是這三路菜，攏是阮有講--著ê故事：
芋圓蕃薯圓：
阿扁仔做總統ê時，佇「國宴」ê菜單內底囥入去一路「芋仔番薯雞卵糕」，「象徵」本省人佮外省人會當團結合作，無分你我。
囡仔本來想欲重現這路菜，in mā想欲做雞卵糕。毋過時間無夠，in後來改做芋圓蕃薯圓kiau做伙，thàu烏糖水。好食！閣足有意義。
俗-pháng-kauh（sandwich ）
台灣人是按怎對食米轉成食麵？這佮美國真有關係。對「總匯三明治」這个食物開始講ê故事，其實就是台灣佮美國，有時做好朋友有時又閣咧冤家，關係起起落落ê故事。
囡仔咧tshuân這路菜ê時，毋知敢有想起阮講ê故事？毋過我看著桌頂ê俗-pháng-kāuh，是真感動。
番薯飯
古早ê台灣人，其實生活過甲真苦，米無通逐家食飽，攏需要lām番薯做陣食。
足濟序大這馬看著番薯就倒彈，一頓飯愛食兩碗白飯。毋過，囡仔反倒是真愛食番薯。in無愛干焦白飯，愛摻番薯較好食。這就是無仝世代ê差別啦。
其實，無論是啥物菜，煮甲按怎，後尾大人細漢攏歡歡喜喜食了。
大成功！
2025.07.20
Page updated
Report abuse