龍銀妖＿台

1.​

「飛--囉！飛--囉！來飛--囉！」

​

共銀仙阿姐當做圓心，一陣一陣的ê喝咻親像海波浪，對四箍圍仔傳出去。就算是講一直佇深窟仔外口四界遹，直直想欲去冒險，想欲飛甲遠遠--ê，彼个細粒仔囝，聽著這陣通天ê唏嚇叫了後，mā緊迸迸，走敢若飛咧，衝對深窟仔，佮逐家做陣相齊。

​

一幫妖精興phu̍t phu̍t佇深窟仔內底噭噭叫，閣加上一陣妖撇翼ê聲，予深窟仔內底四箍圍仔ê岩石回音出去，響聲lông-lông。覆佇塗跤攏ē用得感覺著這陣ê振動。對塗跤深底傳來ê振動，明呼明唱：

​

龍銀妖，欲飛--矣。

2.

銀仙阿姐感應著ê時，細粒仔囝拄咧深窟仔外口三百尺遐ê樹林仔內。通天懸ê hi-nóo-khih，葉仔發甲真茂，細粒仔囝老神定定，真有把握袂予人發覺著伊ê身影。伊對這叢樹仔，飛到彼叢樹仔，跤手扭掠，一目nih仔就飛--甲遠遠遠，就算講有啥物人拄對彼咧方向看過去，干焦會看著一條閃光，叫是家己ê目睭花--去。

​

細粒仔囝聽著妖仔咧喝咻，hiong-hiong-狂-狂飛轉去深窟仔ê時，銀仙阿姐已經感應煞--囉。阿姐恢復伊原本ê 形，目睭瞌瞌，雙翼合起來收佇尻脊骿，穩穩仔坐佇水源頭彼ê水池ê邊仔，遐有一个空，拄拄仔好會當予一粒龍銀妖徛佇內底。

​

細粒仔囝聽阿兄阿姐in講，銀仙阿姐這擺有真強ê感應。一開始敢若佮以早仝款，輕輕仔起顫，後尾就開始頭頂下面倒爿正爿咧跳，跳甲ting-tōng幌。佇彼空內底，猶看會著邊仔ê岩石頂懸，有銀色--ê、刮著--ê一條一條痕跡。因為動甲傷雄，銀仙阿姐開始遨遨輾。親像一sian銀角仔，tng--一聲hông彈去天頂，若是節力甲拄拄仔好，銀角仔落佇塗跤就會踅-ling-long。閣較厲害ê，閣會用ē聽著ong-ong--ê聲。

​

銀仙阿姐就是像按呢，遨--甲ong-ong-響。

​

「足久無看著這種情形囉。到底是啥物人，伊是做啥物天大ê好事？竟然會予銀仙有遮爾大ê感應！」老阿兄目睭沙微沙微，頕頭講話。已經足久足久，伊毋捌遮爾仔興-tshuah-tshuah囉。